ما تفعله الحكومة المغربية في تدبير أزمة فيروس كورونا هو عمل جبار وجاد يهدف لتفادي الإصابات (ولكن هناك قصور كبير في حماية الأطر الصحية اللي منعدمة أحيانا)، ولحد الساعة لم تسجل أي حالة عدوى منتقلة بين الأشخاص داخل المغرب، وإنما كلها حالات قادمة من الخارج ولله الحمد.
إغلاق الحدود، وقف التظاهرات، توقيف المباريات الرياضية وتوقيف الدراسة، كلها أمور تُظهر مدى جدية الدولة بكامل مؤسساتها في التعامل والتعاطي مع هذا المستجد، ينقص فقط القليل من التواصل، واستعمال وسائل الإعلام (العمومية والخاصة، وبز منهم، نحن في حالة أزمة وجائحة عالمية، حيث الهدف هو إنقاذ البشرية، ماشي الربح المادي) من أجل توعية المواطنين وإنقاذ الأرواح مستقبلا…
راه الأمية منتشرة، والناس بزااااف عندهم ثقة فكل ما يقال فالراديو والتلفازة كثر من داكشي اللي كانقولو فالسبيطارات أو بيناتنا، راه كا يلوحو الدوا ويتبعوا العشبة، فالله يرحم الوالدين استعملوا هادشي باش توعيو الناس … راه المستعجلات كا تلقى فيها أكثر من 80 شخص فيهم 10 مراض والباقي مرافقين ودايرين يديهم على نيفهم بحال ايلا الفيروس غيهرهوم فمنخارهوم !!!
تال هاد الدرجة كاين الاستهتار!!!! وبلا مانهضروا على المرافقين من أطفال ومسنين.
الواجب علينا الآن ك “شعب” هو المساهمة فإنجاح هاد الخطوات الرسمية :
• ملي تحبس القرايا، خاصنا نجلسو فالدار ونحبسو السفر والخروج و الدوران، راه هادشي اللي خلا ايطاليا توصل لأزيد من 2000 حالة جديدة يوميا… إيطاااااليا اللي متقدمة علينا تقهرات مع هاد الأعداد!!
• الوزينات والمعامل والمصانع والشاحنات لنقل السلع والمحلات التجارية ما غاديش توقف عندنا، ما تخافوش، نكملوا نفس نمط حياتنا، بنفس الأكل ونفس المستلزمات! ولا داعي الاستنزاف المتاجر ومن موجات الهلع في الأسواق.
• المؤسسات والشركات خاصها تنقص من عدد الموظفين العاملين لأقصى حد ممكن وتطلق الناس يخدموا من الدار إذا ممكن ولا تعطيهم عطل وتتحرك بالحد الأدنى، باش ننقصو من الزحام فالمواصلات!
• مشيت لشي بلاصة لقيتها عامرة، نبدل البلاصة … لقيت الصف، نخلي متر و نصف مع اللي قبل مني واللي من بعدي… القهاوي نحاولو نجلسو برا أو متباعدين… نحبسوا التدخين فالأماكن العمومية، باش لا قدر الله و شدك كورونا تلقى باش تعاون راسك وتتنفس حتى يفوتك!
• التعناق والبوسان والأحضان بلاش الله يرحم الوالدين… المحبة تابثة والاحتياط واجب ونهار يمشي كورونا نديرو مهرجان الحب واللي لقا شي كائن حي يعنقو !!!!
ب.س : فالأخير، كانطلب من أي واحد قدر ينشر هادشي ينشرو … اذا قدر كل واحد فينا يقنع غير واحد آخر، وخلاه بدورو يقنع واحد آخر راه غادي ننقصو من احتمال العدوى بشكل كبير بزااااف….
وعيوا عفاكوم أسركم وصحابكوم والناس اللي ماقاريينش.. وعوض الاستهانة بالموضوع كل واحد يعطي المثل براسو.. الوقاية والعزل خصهوم يبداوا اليوم قبل غدا !
#يوميات_كورونا
#استهلك_بلا_ما_تهلك
