هاد الولد قدامك صاحب الضحكة الرائعة سميتو “محمد” .. محمد كايقرا فالسيزيام (الأولى باكلوريا) ف ثانوية ف حي كاليفورنيا – الدار البيضاء!
محمد كنت غاتدوز عندو الام ديالو باش يرجعو مجموعين للدار، لكن تشغلت شويا، صونات عليه قالت ليه صافي فشا تخرج من الثانوية ركب فالطرامواي واجي بحالك للدار!!
فعلا خرج من الثانوية ماشي للطرام تعرض ليه شفّار بغا يسرق ليه التيليفون .. رفض محمد لكن الشفار كان عااازم وما تراجعش لدرجة انه ضرب محمد ضربة خايبة بالموس، سرق ليه التيليفون وخلاه غرقان ف دماياتو 😔
من نهار عقلت على راسي وانا كانعرف ان الشفار عندو الغرض يسرق فقط، ما باغيش يآذي و يضرب ويتعدى .. لكن هاد الوقت لي حنا فيه كايبانلي الشفار ما بقاش مسوق، يقدر يضرب ويجرح وربما يقتل في سبيل السرقة .. ربما حيت دوافع السرقة اختلفت، شحال هادي كانت الدوافع هي الجوع والفقر وقلة الحاجة، اما دابا دوافع السرقة عند بزاف د الشفارة هي الادمان (الحشيش والقرقوبي وليكسطا ولادروغ…) 🧐
الواقع ديالنا ولا مخيف بزااف، واكفس حاجة ممكن يتحرم منها الانسان من بعد الحرية ديالو هي “الأمان”، الى غاب الامان كاتغيب القدرة على الحياة والعطاء والاستمتاع والراحة!! 😳
بغينا المقاربة الامنية تكون اقوى وتكون رااادعة للمجرمين، ولكن الامن بوحدو ما كافييش باش توقف “ظاااهرة” .. حنا ما بغيناش نوقفو المجرمين ونساليو معاهم، الغاية الاهم هي توقف صناعة المجرم من اللول، خاص اعادة النظر فالاسرة (سطر على الاسرة مليون سطر) والمنظومة التعليمية والجاامع (الخطاب القيمي والاخلاقي) والحومة والاعلام وزييدك حتى السوشل ميديا!!!!! 🧐
ما عرفتش شنو خاص يوقع باش تكن شي ثورة اصلاحية اجتماعية ديال الصح، واش نتسناو حتى تولي البلاد تحت رحمة مالين السيوف؟؟؟ 😳
الله يرحم محمد ويصبر والديه .. ويااااا ربي تهدي المسؤولين د هاد البلاد لما فيه خير للبلاد والعباد، ما عندناش شي خيار اخر من غير هادا مع الاسف 😔
![](https://varpresse.ma/wp-content/uploads/2020/10/FB_IMG_1602536273867.jpg)