729×90
729×90
1200X200

هام.. كيفاش تحسب CNSS ديالك

هام.. كيفاش تحسب CNSS ديالك

فاربريس

هاد المعلومات راه ممكن تخسر عليهم الفلوس عند الكونطابيليتي قرا بشوية عليك باش تفهم كيفاش تحسب CNSS ديالك

أولا : CNSS أو ما يسمى بالصندوق الوطني للضمان الإجتماعي، صندوق كيقدم مجموعة من الخدمات للموطنين (لي خدامين فالقطاع الخاص) من بينها التعويض على فقدان الشغل، الحصول على التقاعد ….

المهم المشاركة في CNSS إجباري على جميع الشركات فالمغرب وبمعنى آخر إجباري على أي عامل فالقطاع الخاص يكون عندو بدون إستثناء، بمجرد ماكتبدا العمل فشي شركة خصهم يدكلاريو بيك في CNSS بقوة القانون.
وخا شحال كنساهم أنا كعامل ف CNSS باش نشد تقاعد كتساهم تقريبا ب %6.7 من الصالير (مايسمى ب SBI ). والمشغل ديالك كيخلص عليك كذالك تقريبا %21 من (SBI)

ثانيا: كيفاش تحسب التقاعد ديالك.

كيخصك تكون وصلتي ل 60 سنة أولا.
وخاصك تكون جمعتي 3240 نقطة (نقطة كيقصدو بها يوم عمل) بمعنى خصك تكون خدمتي 3240 يوم مدكلاري. لي ممكن تجمعها تقريبا في 11 عام من العمل المتواصل.
3240 نقطة كيعطيك الحق تستافد بتقاعد ديال %50 ديال الصالير المتوسط باش كنتي خدام 8 سنوات الأخيرة ( 96 شهر) نعطيك مثال : آخر 96 شهر خدمتي ب 5000 درهم. كناخدو هاد 5000 درهم ضارب %50 غتعطينا تقاعد ديال 2500 درهم.
لكن السؤال لي ممكن تسول دبا هو إلا مثلا وصلتي لأكثر من 3240 نقطة. مثلا 5000 نقطة واش غضيع فالنقاط لي شايطين؟
طبعا لا هنا CNSS كتقول ليك على كل 212 نقطة زايدة على 3240 غنزيدك %1 على %50.
لنفترض أنت وصلتي ل 5000 نقطة :
كناخدو 5000 ناقص 3240 تساوي 1760
كناخدو هاد 1760 لي شاط كنقسموها على 212 تساوي %8.3.
يعني غتزيدك %8.3 على %50 لي ديجا غتاخد وغتعطينا 58.30.
ونفترض تخلصتي في آخر 96 شهر بصالير ديال 5000 درهم.
كناخدو 5000 ضارب %58.3 غتعطينا تقاعد ديال 2915 درهم.
ساهل نتمنى تكونو فهمتو.
غير للمعلومة أكبر نسبة ممكن توصل ليها هيا %70 بمعنى آخر أكبر صالير تقاعد ممكن توصل ليه هو 4200 درهم شهريا.

للمعلومة_أيضا واش إلى بغيت مثلا يكون عندي تقاعد أكبر من 4200 درهم واش من حقي. غانجوبك آه طبعا لكن خصك تكون مثلا مشتارك فصندوق CIMR حتى هذا كتخلص فيه كل شهر وفاش كتوصل لتقاعد ديالك كيزيدوك شي بركة فالصالير على حسب أنت شحال بغيتي وشحال كنتي كتخلص ليهم. ( غير هو هاد CIMR إختياري ماشي إجباري. CNSS هو لي إجباري).

ثالثا: واش من حقي نسترجع التعويضات ديالي في حالة ماوصلتش ل 3240 نقطة:

هنا CNSS دايرة ليك 2 ديال الإختيارات:
الإختيار الأول : التأمين الإختياري
يا إما تكمل النقاط لي خاصينك بالفلوس وكيتسمى التأمين الإختياري وضروري تكون جمعتي على الأقل 1080 نقطة وضروري أيضا تكون وقفتي من الخدمة وضروري أيضا دير طلب في غضون عام من نهار وقفتي من الخدمة.
و الإختيار الثاني : إسترجاع مبلغ الإشتراكات
هنا CNSS كتقول ليك من حقك ترجع الفلوس لي كنتي كتخلص ليا بشرط كون وصلتي ل 60 سنة وماتكونش خدام وماتكونش ستافدتي من شي معاش كتعطيه أو كتقترحو CNSS.
(هنا مثلا إلى قدر الله شي أب أو أم توفاو راه من حق دوي الحقوق يطالبو بإسترجاع الإشتراكات)

نتمنى يكونو المعلومات واضحين للجميع.

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *

350×320